ये रे घना

ये रे घना

ये रे घना, ये रे घना

न्हाऊ घाल माझ्या राना

रानामधी पिकं माझी गेली बघ करपून

चाऱ्यासाठी गुरं ढोरं फिरती रे राना-वना

घरामधी पोरं सोरं उपाशी रे दाण्या विना ||१||

विटलो रे आम्ही सारे तुझी आस लावून

साल आता कटल कसं डोईवर कर्जाविना

थोरली पोर आता राहील रे लग्नाविना ||२||

कुठं रे तू बसला, दडी अशी मारून

मनामधी काळ्या सावल्या दिसतात फिरताना

म्हातारी गेली मरून, खावून रे कंद पाना ||३||

ये रे घना, ये रे घना

न्हावू घाल माझ्या मना

जून २००१...

आभाळाची मान

आभाळाची मान

जर तू उदास

भेदून तू हास

आभाळाची कमान

उंचावूनी मान ||१||

अंधाऱ्या कोनाड्यात

सैतानाची जात

बसते आहे हसून

दात असे विचकावून ||२||

दातांच्या फटीतून

अंधाऱ्या गुहेतून

फिरते शोध नजर

करीत पोकळ सफर ||३||

ह्या गुहेचा अंत

हे विश्व अनंत

सफर आपली गडे

पोकळीतून पोकळीकडे ||४||

जर तू उदास

भेदून तू हास

आभाळाची मान

उंचावूनी कमान ||५||

मार्च १९९८...